Potentzia Cappai, una cantadora scarescia.
Chini dd'arregordat prus a tzia Potentzia, cantadora improvvisadora, incantadora de trumas po s'abilidadi in su cantu e nomonada po sa bellesa sua? Candu fessit nascia no si sciit (Is afressus suus tòrrant perou a sa manera de Ciccheddu Olatta -Cuartucciu 1763/1833- e, duncas, podeus pentzai chi issa puru fessit de cussus tempus o de unus cantus annus prus a tradu). Is Lamadronesus nàrant chi fessit de cussu logu e issa etotu si ddu scòviat in custus afressus chi iat improvvisau atobiendisì cun d'un'ateru cantadori, tziu Antiogu Brai. Cust'omini -no si sciit de abi fessit, si pèntzat de is biddixeddas accanta- fiat andau a Lamadronu poita dd'oliat conosci; iat pregontau me' in bidda inoi bivìat e, cand'iat biu una femina de cara bella e sa castiàda ammainadora pesendi acua de sa funtana de Mussu Giacu, dd'iat pregontau:
“Nara femina bona
custa est Lunamatrona?
Nara femina giusta
Lunamatrona est custa?”
Tziu Antiogu no si fiat sballiau poita, luegu, sa cantadora dd'iat torrau:
“Poita mi domandais?
Puntu a coru siais!
Cust'est sa bidda mia
puntu a coru si bia!”
Cumprendiu chi iat ca sa cantadora fiat Potentzia, Tziu Antiogu iat circau de dda spitzulai:
“Ahn, tui ses Potentzia Cappai,
sa chi tàllat e no còsit mai!”
Potentzia insaras, intendendisì spitzulada, dd'iat torrau:
“Sissi! Deu seu issa,
a cresia andeis e no biais missa!”
Tziu Antiogu, unu pagheddu spantau poita no dd'iat arreconottu, si fiat fattu a conosci cun d'unu pagu de spallerìa:
“No mi conoscis ca seu Antiogu?
Nasciu in d'unu pitz''e monti;
tzaccarru perd''e fogu
de cantu seu barra forti!”
Tzia Potentzia Cappai fiat nomonada meda puru poita scidiat spinnicai indovinellus cantendi me' is domus e me' is osterias e su tzaccamanu fiat totu po issa. Is feminas de is biddas no dda podiant biri perou, poita buffàt a ratassa cun is ominis e ... custu no dexìat in cussus tempus.
Intrada chi fiat in cunfiantza cun tziu Antiogu Brai, si agattànt cun issu me' is festas e cantànt impari cument''e chi fessint uno “duo” ante litteram.
Sa cantàda sua prus bella -nomonada in totu su Campidanu 'e mesu, su de Casteddu, Marmilla e Trexenta- fiat “Basamì Bella”, chi is beccius mannus nostus cantànt traballendi e is feminas alichidendi me' in domu.
Basamì Bella (repentina de Antiogu Brai e Potentzia Cappai)
“E basamì bella e basamì bella,
po tui ap'a fai de oru una cappella
po ti biri missa e po ti cunfessai
e basamì bella e beni a ti pagai.
Ni po biri missa ni po biri missa
laba ca no seu ni dama e ni contissa
e no tengiu cosa de podi' eredai
e mortu ti bia prim''e mi basai.
Deu t'ap'a fai manna donidadi
mela rosa bella prena de bundadi
si no basu a tui m'ap'ammacchiai
e basamì bella e beni a ti pagai.
Deu no ti nau chi t'ammacchis po mei
po una pagu cosa ti spranghit su rei
e mandit emissarius po ti presurai
e mortu ti bia prim''e mi basai.
Ni cun emissarius ni cun emissarius
is fueddus tuus mi sunt contrarius
cument''e piccinna ti depu scusai
e basamì bella e beni a ti pagai.
Cument''e piccinna cument''e piccinna
anca t'ind'arruat in conca una pinna
chi cument''e tronu ti potzat calai
e mortu ti bia prim''e mi basai.”
Speru chi calincunu tengiat ateras scedas de custa cantadora e ddas potzat acciungi' me' innoi.
|
Tutti i Forum
Potentzia Cappai, cantadora campidanesa
Qui c'è:
Inserito il - 06/04/2009 : 11:56:49
Lombardia ~
Città: Milano ~
Messaggi: 