| V I S U A L I Z Z A D I S C U S S I O N E |
| poesianu |
Inserito il - 20/02/2014 : 20:19:47
Cleopatr' est' istada
' na perfida reina,
incestuos' e bramosu isfogu.
Prite no l' at firmada
sa manu assassina,
sa Sardign' inter' at allutt' in fogu.
No! Issa beni poi,
pro disastrare goi,
domos e terrinos de onzi logu.
Inveze de produer,
malaitt' est bennida pro distruer.
Zente de mal'affare
acchistana s'istima,
de sos ladros chi sun' in parlamentu.
Reent pontes in mare,
rueent in terra firma,
sena fundamentas, ferr'e cimentu.
Cussos delinquentes
pro pagare tangentes,
trufana s'Istadu onzi momentu.
Criminales ladrones
proibid' a los ponner in presone.
Cun gridos inumanos
e lagrimas in chizu,
Mazzoccu'in su ciclone pluviale.
ndi l' essit dae manos
s'isfortunadu fizu,
gherrende cun disbattu infernale.
Sena perun' azzudu
attogan' in su ludu,
ingullidos in su fluss' epocale.
Una fraterna manu,
Mazzoccu fit ancora fort' e sanu.
Niunu at bonu proe,
in sa circustanzia
de cuss' improvvisa calamidade.
Tanzi est un'eroe,
salva s'ambulanzia,
morit in tremenda fatalidade.
Onorat sa divisa,
de sambene intrisa,
cun amore fratern' e caridade.
S'Istad' at su dovere,
bestire sa divis' a sa muzere.
Ingrata no perdona,
est' Issa inumana,
semenende morte est sa reina.
Patrizia Corona
e sa fiza Morgana,
morint in vettur' in via Cina.
Flore, Loriga, Brundu,
de s'istrampa in fundu,
sempre culp' e sa manu assassina.
Su ponte est crolladu,
chi fessit de cartone fraigadu.
Fiuman' in piena
non solu de s'aera,
at sa Sardign' intera devastada.
Morit in Arzachena
familia intera,
in sa dom' insoro allagazzada.
Cando sa mala sorte
decretat sa morte,
isperanzi' e salvesa no b'ada.
Dezidit s'isventura,
mancu sa domo amad'est segura.
Ludu! Abba niedda
ue s'undada passa,
bi trasinat totu cun' istrasuras.
Morit sa Raganedda,
morit Maria Massa,
e Vannina Figus in dom' a Uras.
Salva in s'abit' altu,
e morit de infaltu,
Marì Frigiolini sena curas.
Non solu s'abb' ebbia,
morit disperad' e sa timoria.
Mortos in su ciclone,
amados, cumpiantos,
venerados da' s'isula intera.
Tenzant redenzione,
a glori'e sos santos,
cunsagrados in sa Celest'isfera.
Preghent pro sa Sardigna,
ondrada, siat digna,
connoscher un'eterna primavera.
Crescat ogni laore,
regnu de isconfinad' amore.
Deus! S'isul' amena
salvala cun' amore,
beneighe: mare, chelu e terra.
Mae connoscat pena,
piantu e dolore,
uraganos, terremotos e gherra.
Vivat in allegria,
paghe sant' armonia,
sen' aere peruna cuntierra.
De basciu a susu,
Disgrascias no suzzedant piusu.
|
|
|
Tutti i Forum
Ciclone Cleopatra
