| V I S U A L I Z Z A D I S C U S S I O N E |
| Orani71 |
Inserito il - 31/01/2009 : 22:15:12
Corriolos
Corriolos de nues
curren in su chelu virmu
trasparente
che lastra e gristagliu,
e lacrimas no han
pro custa terra sicca
uve creschen solu ispinas
e brujan peri sas predas.
Corriolos de coros,
lassaos intro sar domos
supra sas cosas amadas;
a malavozza lassadas
rimpiantos de cada die
e cada notte sonnadas.
Corriolos de vida
supra su ludu imbolaos
samben de vrades ghessau,
pianghen duas mamas
pro cada izu bangau.
Corriolos de isperanzas
azizu azizu ligaos
chin d'unu ilu
sottile e debile
che tallaranu e mamasori.
Daniela Murru |
| 10 U L T I M E R I S P O S T E (in alto le più recenti) |
| Orani71 |
Inserito il - 13/05/2012 : 11:38:01
ORANE
In-d-una amena vadde singulare,
Orane, bella, ricca e minerària,
Cun fertile campagna meda vària
E istòricos centros de ammirare.
Sa montagna 'e sa Vérgine 'e Gonare
Ti faghet in Sardigna leggendària:
Vigilante da era millenària
Da Levante a Ponente a ogni mare.
D'illustres personaggios digna mama
Chi an ispartu in chimbe continentes
Cun sa virtude issoro onore e fama.
Uve s'elevan e faghen istòria
Un'ischiera de intelligentes
De sa Sardigna nostra onore e glòria.
Gesuino Soro |
| Orani71 |
Inserito il - 07/06/2009 : 18:32:17
A su ladru
No sento su valore 'e su gurticciu
Nen d'unu cantu 'e gomma arrotulau,
Essende su tribbagliu unu pasticciu
Ca, no it'a impignu tribbagliau.
Sento solu ca como ippo ispicciu
De vier unu izu cuntentau.
Ma vuradu lis han s'ispassu issoro,
Balla chi nde lir ventulet su coro!
Sos oggettos furados fini trese
Gasi tres lanzas l'intret d'erru vrittu.
Nde li sechen sas manos e sos pese
E lu circulen intro su carrittu.
Minuttos cantu tenet ogni mese
Cadaunu lis siat malaittu.
Custu li naro pro prim'auguriu:
Tottu sa vida la colet marturiu.
Marturiu la colet tottu vida
Chene tenner de bonu unu signale
Ossos e purpa s'agattet marzida
Chin d'ogni verme d'unu quintale.
Marza l'abbascet da onzi verida,
Ch'in domo sua curgiat a canale.
Sa materia cotta ei sa crua
Nde trazzet cantu v'hat in domo sua.
Dae sor muros nde tire' sor ciois
Chi non bi restet nudda mancu broccos,
Semper agonizzande li essat ois.
E semper li cunvertana in irroccos.
Perdonu venzat a pedire a nois
E interrare lu potthan chene toccos.
Prima chi nde lu ghettene a sa ossa
Cada cane li tiret una mossa.
Una mossa li tiret cada cane
Chi tottus sinde leene unu cantu,
Lu trascinen innoche e in cuddane
Chi no arribet mancu a campusantu.
Sa notizia l'iscian in Orane
Peri inue su sole bettat mantu.
Peri sos animales tottucantos
Iscan sa vine sua pro ispantos.
Chene nde tenner de cumpassione,
S'iscazzene che piche, acidu e soda,
Poi li niat sa tentazione:
"Como lu pacas mesicheddu e roda.
Ca no has attu restituzione
Como si, chi lu pacas a sa moda.
Inoche jal'iscontas su delittu
De roda, mesicheddu e de carrittu".
Salvatore Soro |
| Orani71 |
Inserito il - 02/05/2009 : 11:22:39
Perdonu
In custu mundu de raru isplendore
Chi arpas sonana e chi sirenas cantana
E danzas e boches bellas nos incantana
Dettandenos messaggios de amore.
Bi hat peri serpentes ch'istrisciana
In campos de viores profumaos,
De odiu e de rancore abbenenaos
Chi in sas cosas vonas sind'ammisciana;
Semenande zizzanias e imbidias
In coro sanos e in mentes onestas,
Cun rittos malos e profanas festas,
Evocande satanicas insidias
Vanificande s'oziu e sa noia,
Inculcande malefica una lucche;
Glorificamus su Cristos in grucche
Chi sos coros nos saziat de gloria.
Perdonande e pedinde su peronu,
Vivende cun rispettu e umiltade,
Osservande sa Santa Trinidade
Cadaunu diventat ius bonu.
Amandenos in manera armoniosa,
Lassande de rancore onzi brevettu,
E prima de tirare su grillettu
Su vusile diventat una rosa.
Ponimus sa vendetta in abbandonu,
Abbrazamus s'amore ei sa pache,
De odios seccande onzi tanache,
Ca sa menzus vendetta est su perdonu.
Gesuino Soro |
| Orani71 |
Inserito il - 18/04/2009 : 11:45:47
Pro unu soriche mortu de dirvada
Perdonami sa morte o soricone
Pruite chi de dirvada di appo mortu
Isconzande unu cantu e muru in s'ortu
A s'ischina di appo ertu su piccone.
Già via essidu in bonora a Istolo
S'annu 55 e novichentos
Data chi lassat traccia e sentimentos
Chi cantu duro in vida minde addolo.
Ite dolu ite pena mi as attidu
Cando su tiru crudu ti appo iscuttu
E pius ancora videndedi ruttu
Marcas assusu in su matessi nidu.
Commovias su coro su pius duru
De comente vis vezzu e fis romasu
Si vidiat chi a sa crisi de su casu
Su jigunzu provau as tue puru.
Ma, non fis solu andende in sa campagna
Ramingu chin affannos e dolores
Ca vin puru massajos e pastores
Pro sa causa ingrata 'e sa sicagna.
E mentres meditende via in sa zona
De sa gama chi s'annu hat resu paccu
Mi giro e bido ennire a passu istraccu
Sa regina 'e sa domo, sa padrona.
Custa, appenas chi hat bidu s'isilisciu,
Mancu arcadas hat appiu de si vranghere
Tando ambos cuminzamus a pianghere
Lacrimas, a su nidu tottu ammisciu.
Sos izicheddos puru, ite iscunfortu,
Chi afranzados inie in carre carre
A tzirrios parian de mi narre
Proite a babbu nostru nos as mortu?
E deo a tale ispasimu assamuda
Istesi, che chi essere atu de taula,
Solamente 'e cunfortu una paraula
Commossu appo rivoltu a sa viuda.
Coraggiu! E a su lutu tantu lestra
Non sias, pro chi sa dirgrascia est manna
Chi Deus abortas cunzat una janna
Nat su diciu, e aperit sa vinestra.
Ateras puru v'indat in su mundu
Muzeres, chi an affettu e coro vrimu
E, cando moriti su maritu primu
Riaperin s'amore a su sicundu.
Vachen sicunda vesta a s'isposonzu
Non che sa prima che es primaverile,
E gasi sinde irmentican s'aprile
Odorende viores de s'atonzu.
E tue soricone chi, in cust'annu
Sa morte ti hat truncau s'esistenzia
Vaghe in s'ateru mundu penitenzia
Pro iscontare de custu su dannu.
Cantu casu, sacchettas de orgiu e tricu
Has toccau, de nuzola, de ava e mendula
E in cantas traves su pendula pendula
Has fattu in domo de poveru e riccu.
E deo in zerto riccos macasinos
Pro danno tou, in momentos iscapulos
Tupande calas e ponende tapulos
Minde so cottu, assazande sos vinos:
E su nidu non fit fattu de papiru
De istrazzos, paza, pedde, sola e pias?
E in campagna cantu buscaias
Su denotte, vaghendedi unu giru?
Ma, su pius chi m'hat fattu ispaventu
Cando eo controllau appo su nidu
E tando in mesu de sa paza appo vidu
Unu bigliette 'e milli, unu 'e chentu
Mancu pro cussu ne furca ne fune
Meritavas, si esseren pius de mille
Pejus pro chie ancora est imbecille
Chi cuvat su dinare in su malune.
Ei tue piccone, chi sa gruche
Ses istau in sa vida a su bracciante
Semper ingratu, rusticu e pesante
Peri cando sa manica est de nuche.
Como, eo, pro castigu e pro ribrezzu
E pro chi non mi ripites cussu jocu
Sa manica nde brujio in dunu ocu
E a tive d'iscazo a erru vezzu.
E tue soricone sutta lapida
Non sies de s'ifferru in su profundu
Perdonami sa morte, pro su mundu
E si appo ispesu carchi rima isciapada.
Pro cumpensu sa rustica canthone
In s'eternu di servat de confortu
Pruite che de dirvada ti appo mortu
Perdonami sa morte o soricone.
Giuseppe Zichi |
| Orani71 |
Inserito il - 21/03/2009 : 11:54:04
Sos anzianos de Orane
Chi isten in Istolo o in Cumbentu
Si ba frittu non bessin pro niente.
Sind'isserran in intro su cajentu
Isettande su tempus pius clemente.
E appenas ch'in bonu cambiada
Dae su portellu osservan s'orizzonte.
Istuppan tottus pro s'isassizzada,
Partin tottus in gruppu dae su ponte.
Si contan sos ammentos
Si leghen su giornale pro unu pacu.
In sa pipa tabaccu,
E mi paren felices e cuntentos.
Bois ch'azes girau e bidu mundu,
O zios meos nade,
Mi parides chin animu giocundu,
Itt'es pro vois sa velicidade?
Lorenzo Costantino Brandinu |
| Orani71 |
Inserito il - 15/03/2009 : 10:57:13
Vintichimbe
Circundada de vertiles campagnas
d'eliches, chercos, roccas, matta e littu,
de minieras chi no han cumpagnas,
de talcu, chi su mundu nde ha profittu.
Vrisc'abba bundas dae sas intragnas,
in umbras chi a sostare dan invitu.
Ca sa Reina in te vaghet abbitu
ses Gonare, Reina 'e sas montagnas.
Su vintichimbe 'e marthu, in usu anticu,
pro sacru impignu, in su monte su pane
davan beneittu, a tottu sos pizzinnos.
Poi sa missa valavan a Orane
pistande nive, a sonu 'e tintinnos
chin su cocone astrintu a su survicu.
Giuseppe Zichi |
| Orani71 |
Inserito il - 15/02/2009 : 10:27:10
Pro ziu Titinu Nivola
Ziu Titinu s'est oje in Paradisu,
Nos vadiat chin modos risulanos.
At a narrer:"Sos meos paesanos
Cand'ipo vivu zertos mi han derisu.
Sos regnantes de tando italianos
Mai cust'arte ana cundivisu.
Dae sa zente mea mi an divisu,
E m'an coglìu sos americanos,
E como tottus a un improvisu
Mi sun divinizzande conca e manos".
Perdonu li pedimus pro s'offesa
Si cumpresu non l'amus dae prima
Azes nessi a mortu'e l'onorare.
Ca in su coro'e sa zente oranesa
Abbarrat cara pro isse s'istima
Eterna chei su monte de Gonare.
Totoni Pinna |
| Orani71 |
Inserito il - 07/02/2009 : 16:56:34
Sa poesia
Sa poesia est'un'ispez'i e cosa
chi su coro rispondet a serenu,
pro cantu siat seria o ispiritosa
paghe portat a s'omine terrenu.
Si tue cumprendes su significau
la leghes o l'imbentas si nd'has vena,
ses dae su profundu sullevau,
ti dogat da su coro dogni pena.
Ca pro s'amante de sa poesia
non b'esistit problema senz'ispera.
E su chi paret grigiu paret rosa.
Picat su volu chin sa vantasia
che puzone chi volat in s'aera,
giosat in libertade in donzi cosa.
Lorenzo Costantino Brandinu |
| cat-erpillar |
Inserito il - 02/02/2009 : 22:20:55
Brandinu....su menzus in sa zezione emigrados in sa 48° edizione de su cuncursu "premio ozieri"
|
| Orani71 |
Inserito il - 02/02/2009 : 21:19:37
Terra sarda
Emigrante ja so in continente,
dae tropp'annos durat su distaccu.
Si vi chergio pessare pius pacu
galu pius mi venit a sa mente.
Sa Sardigna mi torrat in memoria
cuddade battor mares circundada.
De battor partes una es coltivada
tres partes montagnosas non han gloria.
Est una terra agreste ch'in beranu
si cucuzzat de ervas e fiores.
Inuve cittadinos e pastores
iscuvilan chitho su manzanu.
B'hat tancas solitarias e bellas
e baddes fiorias e ervosas
in cussos locos passas e riposas
da sa memoria pius no los cancellas.
B'hat tancas e forestas animosas
inuve viven chervos e sirvones
e perdiches chin atteros puzones,
b'hat funtanas chin abbas gloriosas.
B'hat unu sole su sero calante
da unu chelu ruju e cenerinu.
E lassat chi sa luna su caminu
mustret a su nottornu viandante.
Lorenzo Costantino Brandinu |
|
|
Tutti i Forum
Cantores de Orane
