| V I S U A L I Z Z A D I S C U S S I O N E |
| cat-erpillar |
Inserito il - 25/04/2008 : 15:40:13
Pustis de meses e meses de ricerca, finalmente appo agattau custa poesia e sa publicazione intrea de custu poeta, Zoseppe Moro, Orgolesu, naschidu in su 1908 e mortu in 1958 a chimbantanno giustos
su libru s'intitulada S'AERE TENTU SORTE, editu in su 2004 da DOMUS DE JANAS.
in particulare custa est una poesia, meda bella, ben'istruTurada, chi pone su poeta orgolesu a sos altos livellos de sa poesia sarda.
Leggidela tottu canca e si sezis amantas de sa poesia, comporabos su libru ca merita
S’ALFABETICU
Amadu e veneradu Creadore,
aggiuda unu poeta pagu iscetticu
a cumponner in ordine alfabeticu
affettuosos versos de amore.
Achistadu no apo estru poeticu,
appòsitu Ti giamo a protettore:
assistimi Ti prego a supplicare
a sa chi no si dignat de m’amare.
Autore no so de poesia,
appena appena rimo sas ottadas.
Apprèndelas però, diletta mia,
a tie est chi las apo dedicadas
alfabeticamente cumpiladas
alavende sa tua simpatia.
Anghela, las cuminzo in domandare:
a ite no ti dignas de m’amare?
Beneditta e dicciosa creatura,
beni como a mi dare unu cunfortu:
bides chi so in ansia e in tristura
bramende e sena tenner accunortu.
Bene meu, ti giuro, so resortu
biver cun tegus o in sepoltura:
biu però no poto prus istare,
bella, si no ti dignas de m’amare.
Creadore supremu e dominante
celebre de bellesa at fattu a tie.
Columba, eo t’adoro notte e die
cant’amesit Ruggero a Bradamante:
carignu cando fagher dês a mie,
cara, si no m’azzettas pro amante?
Coment’eo ap’a poder respirare,
coro, si no ti dignas de m’amare?
Deus chin su podere immensu sou
de tene s’est servidu pro modellu.
Divinamente t’at formadu a prou
distinta ’e supraffinu bisu bellu:
Difattis est su summu trattu tou
difficultade a s’umanu pennellu.
Dina però ti torro a dimandare:
Da ite no ti dignas de m’amare?
Elena fit s’iscettru e-i s’insigna
esaltada pro amena sembianza.
Ebe fit s’esemplare in eleganza,
Ester, Armida, Angelica e Ciprigna.
E tue chi ses d’issas pius digna
eccellente sen’aer simizanza.
Eo no cesso mai ’e ti cantare
eppuru no ti dignas de m’amare.
Frizzas de s’amorosu bisu e sinu
fortemente su coro m’an passadu.
Fiamas si m’azzendene continu
furibundas in pettus agitadu.
Fidele depo istare e genuinu
forzis prus de su limite fissadu.
Felicidade no devo lograre
finas chi no ti dignas de m’amare.
Gesù Cristu padronu de s’altura
grazias t’at donadu e dignidade
gentilesa eleganza e beltade
geniu allettadore ’e biancura.
Gosu ses de s’umana gioventura
giamada ses modellu de bontade:
generosa no t’apo a nominare,
gemma, si no ti dignas de m’amare.
Hammirabile perla preziada
haccisu de sos coros prus dicciosos
hillustrada finesa incumparada
hisolanos pro te sun orgogliosos
horganu de sos sensos amorosos
horo de ti pagare no bi nd’ada.
Helogios no cesso de ti dare
he tue no ti dignas de m’amare.
Immagine sublime e attraente
incantu de sos coros cristianos
istella luminosa e risplendente
isperanza de tottu sos mundanos
ispettende so sempr’inutilmente
isguardos de amore risulanos.
Indiferente ti cheres mustrare:
it’as chi no ti dignas de m’amare?
Levante giaru de solenne isfera
lughe ghìa e ampàru de su mundu
luna chi lughes in sa patria intera
ladina pro s’aspettu chi as giocundu
lassare no mi dês si ses sincera
lamentosu che unu moribundu.
Lanza tremenda a mi suicidare
leo si no ti dignas de m’amare.
Misteriosa novella Lucina
memorabiles lodes t’ana dadu.
Mamma de sa bellesa peregrina
meraviglia d’ogn’esser animadu
mai però a mie mi as basadu
mancu ch’essère postu in disciplina.
Miserinu comente ap’a campare?
Morzo si no ti dignas de m’amare.
Notoria bandera italiana,
natura est chi t’at fattu maestosa.
Nominéndeti pro esser graziosa
numerosos encomios ti dana.
Nessi pro amore ’e Deus, cristiana,
nara si ses o nono mea isposa.
No creo chi mi dês sentenziare
nende chi no ti dignas de m’amare.
Oriente de ogni traviadu
oceanu de bàlsamu pienu
onore de su mundu ses e frenu
oggettu su prus caru e apprezzadu
ojos chi sos cumpanzos cuntempladu
omine no at mai in su terrenu.
Ora no isto sena replicare:
ohi, si no ti dignas de m’amare.
Pateticu dipintu riservadu
paragone no at su Vaticanu
pittura d’un’insigne esatta manu
pernu de unu coro innamoradu
paradisu dês aer preparadu
palma, cando ti giamat su Sovranu.
Prima però d’andares a gosare
proite no ti dignas de m’amare?
Quadru lineadu cun primore
quotidianamente veneradu
quadernos ap’eo impiegadu
qualifichende su tou balore.
Quale inimigu mi lassas turbadu
quasi che unu indignu de amore.
Quantu duro devo suspirare
quindi, si no ti dignas de m’amare.
Ritrattu su prus bellu e suntuosu
rara prenda ses tue calculada.
Ricumpensare podes un’isposu
ricambiende s’amore chi t’ada.
Rosa, a mi dare no ti ses dignada
rie-rie un’abbrazzu affettuosu.
Risentidu in profundu meditare
resto si no ti dignas de m’amare.
Santos no cesso de pregare a Deu
semper pro dare lodes pius a tie.
Serafinos cun gosu sun inie,
suplican a ti dare onzi recreu.
Suave ànima pura e sena neu,
suffrire no mi lesses de gasie.
Subitànea morte ap’a pregare
si tue no ti dignas de m’amare.
Trinidade est ch’in te at sistemadu
tantu perfettos sos lineamentos.
Turturella, a mie mi as privadu
talentu, forza, briu e sentimentos.
Tesoro, pro restare isconsoladu
totta sa bida in pena e patimentu
tumba profunda m’as a preparare
tue si no ti dignas de m’amare.
Universu de te est incantadu,
unigenita dea altolocada.
Umanidade no at ancora amadu
uguale ermosura delicada.
Una ’orta però no m’as mustradu
umile sorridente una mirada.
Urtimamente su meu isperare
ue est si no ti dignas de m’amare?
Verginella reina de inclìtas,
vasu pienu de affezione
vigura chi sos mortos resuscìtas
visu ch’abbagliat s’umana pessone
vivente forzis prus no mi bisitas
vemmina, si no nd’as cumpassione.
Vida mia, bidéndemi ispirare
vinis si no ti dignas de m’amare.
Zaffiru brilladore orientale
zendadu t’at a fagher ornamentu.
Zente confirmat ca no ses mortale
zigantes ti costruin monumentu.
Zelu però cun megus no as tentu
zittella pro destinu o ideale.
Zittu dolente m’apo a consumare,
zòvana, si no ti dignas de m’amare.
A ite no aperis, terra dura,
una fossa profunda a m’ingullire?
E gai in sinu tou at a finire
sa mea irrefrenabile isventura
già chi sa prediletta creatura
in coro no m’at chérfidu allogire
e mi lassat sas dies terminare
pro no s’esser dignada de mi amare.
Su perdonu dimando a su lettore
si est iscarsa sa cantone mia
ca pro cumponner bera poesia
bi cheret esattissimu autore
e siat pro piaghere o pro amore
iscuset puru ’e sa calligrafia
e lu saludat chin tottu su coro
s’autore e amigu Peppe Moro. |
|
|
Tutti i Forum
ZOSEPPE MORO
